Ginalauman nga magabalik si anay Department of Public Works and Highways (DPWH) official Henry Alcantara sang dugang pa nga P200 milyon sa gobyerno bilang kabahin sang restitution sini.
Suno sa Department of Justice (DOJ), posible nga ma-turnover ni Alcantara sa masunod nga semana ang kwarta samtang padayon nga nagalaom ini sa Witness Protection Program (WPP).
Nahibaluan nga sang nagligad nga bulan sang Nobyembre, nakabalik na ini sang P110 milyon sa gobyerno samtang nagapadayon ini sa kooperasyon sa imbestigasyon sa mga anomalya sa flood control projects.
Upod man ni Alcantara sa WPP bilang “protected witnesses” ang anay DPWH officials nga sanday Roberto Bernardo, Brice Hernandez, kag Jaypee Mendoza, nga yara sa “provisional acceptance.”
Samtang, ginpahayag ni DOJ spokesperson Polo Martinez nga ang reklamo batok kay anay Ako Bicol Party-List Rep. Zaldy Co ginsumiter na para sa resolusyon.
Nahibaluan nga si Co gindugang bilang additional respondent sa kaso bahin sa ghost flood control project sang SYMS Construction sa Bulacan, apang wala siya nakasumiter sang counter affidavit.
