ILOILO CITY – Wala sang ideya ang mga opisyal sa Barangay Malipayon, Iloilo City Proper kun may iban pa nga nakaaway ang residente sang ila barangay nga ginluthang-patay sang riding-in-tandem suspects sa prutasan sa Barangay Tabucan, Mandurriao, Iloilo City.
Ang biktima amo si Agustine ‘Nonoy’ Odicta, 52, pakaisa ni the late Melvin Boyet Odicta nga amo ang isa sa mga identified top drug lords sa Western Visayas.
Sa interview sang Bombo Radyo kay Punong Barangay Frederick Hormillosa, iya ginpahayag nga sa iya nahibaluan, maukod sa pagtambong sang drug rehabilitation program kada hapon ang biktima.
Suno kay Hormillosa, drug user sang una ang biktima kag mapintas man kun makainom. Ini nga mga bisyo ang gintalikdan na ni Odicta suno kay Hormillosa bangud nagbag-o na ini, masako sa pagpamanday kag sa pagbantay sa prutasan sa Barangay Tabucan.
Wala man sang nasugid ang biktima nga may nagapamahog sa iya kabuhi ukon may iban siya nga naka-engkwentro antes ang insidente.
Pasado 6:00 kagab-i sang gindulugan sang motorcycle-riding suspects si Odicta, ginluthang, kag ginapahayag anom ka pilas ang naangkon sang biktima lakip na ang patal nga pilas sa dughan kag ulo nga nangin rason sang iya kamatayon.
Madasig naman nga nakapalagyo ang wala nakilal-an nga riding-in-tandem suspects.
Nagapadayon pa subong ang imbestigasyon sang mga pulis may kaangtanan sa amo nga insidente.
