ILOILO CITY- Arestado ang isa ka durugista matapos nakuhaan sang masobra P200,000 nga balor sang shabu sang gin-serbehan sang search warrant sang mga otoridad sa iya balay sa Cabugao Norte, Sta. Barbara, Iloilo.
Ang subject amo si Rey Lamera, 40 anyos kag napreso na sang 2014 bangud man sa iligal nga druga apang nakagwa sang damlag lang kag nagbalik naman sa iligal nga aktibidad.
Sa interview sang Bombo Radyo kay PMaj Rey Pabalan, hepe sang Sta. Barbara Municipal Police Station, iya ginpahayag nga 15 ka adlaw man nila nga ginbantayan ang hulag ni Lamera.
Suno kay Pabalan, ulihi na nila na-monitor ang aktibidad sang subject bangud nga sa banwa sang Pavia ini naga-operate.
Narekober kay Lamera ang 25 ka sachets sang suspected shabu nga ginabanta nagabug-at sang 30 gramos kag may standard drug price nga P204,000.
Magapangatubang si Lamera sang kaso nga paglapas sa Republic Act 9165 ukon Comprehensive Dangerous Drugs Act of 2002.
