Amat-amat na nga nakarekober kag nakaguwa na sa ospital si anay Estancia, Iloilo Mayor Rene Cordero matapos nagpositibo sa COVID-19.
Matandaan nga una nga nagpositibo sa COVID-19 ang anay municipal administrator kag asawa sang anay alkalde nga si Geronima ‘Emma’ Cordero kag ginbawian man sang kabuhi bangud sa amo nga balatian.
Sa interview sang Bombo Radyo kay Dr. Greg Rolan Sumile, Municipal Health Unit officer sa Estancia, Iloilo, iya ginpahayag nga ginsaylo na si former Mayor Cordero sa isa ka hotel sa amo nga banwa.
Suno kay Sumile, padayon naman nga ginamonitor ang kondisyon ni Cordero samtang ginapaidalom sa istrikto nga quarantine.
Gincremate naman ang nagtaliwan nga asawa sang anay alkalde.
Samtang, ginpahayag ni Sumile nga sa subong, nagapadayon pa ang pagtimbuok sang kaso sang COVID-19 sa banwa sang Estancia, Iloilo rason nga naghimo man sila sang mga polisa agud limitahan ang hulag sang mga tawo.
Ang tanan nga merkado sang nasambit nga banwa ang may limited market hours halin las 7:00 sa aga tubtob las 5:00 sang hapon sa diin kada Sabado, may yara sang total disinfection nga ginapatigayon.
Ginalimitahan man ang pagwa sa mga balay sa isa lamang ka myembro sang pamilya sa diin sa kada barangay, may yara sang ginapatigayon nga mga checkpoint.
