GUIMARAS – Nagtaliwan na ang anay bise gobernador sang probinsya sang Guimaras nga si Dr. Edgardo Jabasa sa edad nga 81.
Ini bangud sa nangin kumplikasyon niya nga dala sang COVID-19 infection.
Sa interview sang Bombo Radyo kay Nueva Valencia, Guimaras Mayor Emmanuel Galila, iya ginpahayag nga ginkasubo sang ila banwa ang pagtaliwan sang doktor.
Suno kay Galila, nagpadalagan man bilang Mayor si Dr. Jabasa sang 2004.
Apang ginpahayag ni Galila nga apisar wala nagdaog sa pagka-alkalde si Jabasa, madamo siya sang nabuligan bilang doktor.
Dugang pa niya, ginpaidalom na sa cremation ang lawas sang former vice governor.
Nahibaluan nga magluwas kay Dr. Jabasa, nagpositibo man sa COVID-19 ang asawa sini kag una na nga nagtaliwan.
Sa subong, lunsay naka quarantine naman ang pamilya Jabasa.
Nagapadayon pa ang contact tracing kag indi pa matul-id kun ano ang ginhalinan sang COVID-19 infection sa pamilya Jabasa.
