𝗦𝗔𝗡 𝗘𝗡𝗥𝗜𝗤𝗨𝗘, 𝗜𝗟𝗢𝗜𝗟𝗢 — Nakitaan sang liability ang duha sa pito ka mga pulis sang San Enrique Municipal Police Station matapos nga nagpatuman ang Iloilo Police Provincial Office (IPPO) sang administrative proceedings.
Ini kasunod man sang reklamo kaangot sa wala sang may nagasabat sa istasyon bangud ang mga pulis ang ginapahayag nga nagakatulog samtang may nagapangayo sang bulig.
Sa interview sang Bombo Radyo kay Police Colonel Bayani Razalan, Officer in Charge sang Iloilo Police Provincial Office, iya ginpahayag nga ang duha ka pulis nga may liability amo sanday Police Captain Aierl Dawn Parcon, anay hepe sang San Enrique Police Station kag ang desk officer sini nga si Police Corporal Ryan Barbosa.
Suno kay Razalan, ang nasambit nga penalidad ang ginsumiter na sa Police Regional Office 6 (PRO6) agud nga tun-an kag i-review.
Samtang, ginpahayag man ni Razalan nga ang lima ka mga pulis nga amo sanday Police Senior Master Sergeant Joan Matutino, Police Staff Sergeant Ma Ella Cachuela, Police Staff Sergeant Jivelyn Parcon, Police Staff Sergeant Dyan Rey Parcon, kag Police Corporal Laurence Sionosa ang ibalik sa San Enrique Municipal Police Station bangud nakit-an nga wala sila sang sala.
Ginalauman naman nga idagdag ang penalidad batok sa anay hepe sang San Enrique Municipal Police Station kag desk officer sini sa indi maglawig sang pito tubtob pulo ka adlaw.
