Magaserbe bilang Executive Assistant ni Iloilo City Mayor Jerry Treñas ang anay Iloilo City Police Office (ICPO) Director nga si Police Col. Uldarico Garbanzos.
Nahibaluan nga subong nga adlaw, Nobyembre 8, ginpatigayon ang turn-over of command ceremony kun sa diin nagpungko na ang bag-o nga director sang ICPO nga si Police Col. Leo Batiles.
Sa interview sang Bombo Radyo kay Mayor Treñas, iya ginpahayag nga sa termino ni Garbanzos, nakit-an niya kun ano ka ”outstanding” ang pagpamuno sini bilang director sang ICPO.
Suno sa alkalde, nakit-an man niya kun ano ka hard working ang anay ICPO Director gani nagalaom siya nga matupungan man ini ni Col. Batiles nga amo ang nagtal-os kay Garbanzos.
”Ang term ni Colonel Garbanzos nakita ta, masyado gid ka outstanding. He is a hard worker. I want the next one who will replace him to be as hard working as he is.”
Pahayag ni Treñas, bulan sang Enero sa masunod nga tuig magapungko si Garbanzos bilang Executive Assistant niya.
”Si Colonel kwaon ta executive assistant by January para nga may mabulig sa aton sa peace and order.”
Dugang pa sang alkalde, pinaagi sa bulig ni Garbanzos, nagalaom siya nga mas mangin masanyog ang peace and order sa syudad.
