ILOILO– Nagpatigayon sang preliminary investigation ang Department of Justice para sa kaso nga nagaangot kanday anay Iloilo City Councilor Joshua Alim, anay Iloilo City Councilor Plaridel Nava, Presidential Consultant for Western Visayas Jane Javellana kag Dr. Marigold Gonzalez.
Ini ang may kaangtanan sa ginaalegar falsification of public documents ukon pagpeke sang pila ka mga pirma sa petisyon nga nagapamalabag sa extension sang prangkisa sang Panay Electric Company.
Sa interview sang Bombo Radyo kay Mr. Marcelo Cacho, Administrative Manager sang Panay Electric Company, iya ginpahayag nga ginkakas na sa listhan si Dr. Marigold Gonzalez kag indi na pagpasakaan sang kaso.
Ini bangud nga sa ginpatigayon nga preliminary investigation, natukiban nga wala sang kaangtanan si Gonzales sa pagpeke sang pirma.
Suno kay Cacho, wala nakatambong sanday anay Alim kag Nava sa preliminary investigation.
Nagakadapat nga pamatud-an nanday Alim kag Nava nga wala sila nakabaton sang subpoena bangud kun mapaslawan, sila ang magapangatubang sang nagakaigo nga kaso.
