ILOILO – Gindayaw sang mga opisyal nagikan sa syudad kag probinsya sang Iloilo ang ginhiwat nga inauguration sang Iloilo Provincial Capitol Grounds kag opening of lights kahapon nga adlaw, Disyembre 2.
Ini ang ginakabig bilang isa na naman ka daku nga pag-uswag kag pagbulig sa turismo sang probinsya.
Kaangot diri, nangin emosyonal si anay Iloilo Governor Arthur Defensor Sr. sa iya speech.
Iya ginpahayag nga sa sulod sang madamo nga tinuig sang iya pag-alagad bilang public servant, nahatag na niya ang iya bug-os nga masarangan sa pagpasar sang mga proyekto para ikaayo sang mga pumuluyo.
Suno kay Defensor, ang development sang capitol grounds kag ang pagbutang sa parking place para sa sa mga empleyado ang madugay na niya nga handum kag ini ang katapusan niya nga proyekto para sa probinsya.
Iya ginhingyo sa iya anak kag subong Iloilo Governor Arthur ‘Toto’ Defensor Jr. nga halungan ang proyekto kag nagalaum ang anay gobernador nga matapos na ini sa sulod sang tatlo ka bulan.
Samtang, ginakabig naman ni Iloilo Vice Governor Christine ‘Tingting’ Garin nga isa naman ka maragtas ang bag-o nga proyekto sa probinsya.
Nalakip diri ang mural nga ginatawag ‘Panaysayon sa Paranoblion’.
Ini ang human sa resin fiber plastic kag may takos nga 15 meters long x 2 meters high.
Ini nga proyekto ang base sa design sang mga arkitekto nga sanday Victor Jacinto, Ryan Angelo Braga, Kenneth Torre, kag Jorge Cadiao Jr. upod ang mga sculptors nga sanday Albert Pampliega kag Margarette Pampliega.
Suno kay Garin, ini kag ang iban pa ang ginapatugayunan sang blessing kahapon ang ginpangabudlayan gid sang 12th Sangguniang Panlalawigan kag ni Former Iloilo Governor Arthur Defensor Sr.
Nagalaum man si Garin nga kadungan sang opening of lights sa Iloilo Provincial Capitol, mangin simbolo man ini sang kalinong kag paglaum sa mga pumuluyo.
Suno naman kay Iloilo City Mayor Jerry Treñas, nagapati siya nga potensyal nga lugar ang Iloilo agud mangin kapital sang Meetings, Incentives, Conferences and Exhibitions ukon MICE sang pungsod.
Kasunod diri, nagpasalig ang alklade nga handa siya nga magbulig sa ikasangkad pa sang mga proyekto sa probinsya.
Iya ginpahayag nga mas maayo kun magbinuligay ang Iloilo City kag Provincial Government sa paglab-ot pa sang dugang nga mga handum sa masunod nga mga tinuig.
