ILOILO CITY–
Apat ka counts sang libel case ang ginpasaka ni Sen. Franklin Drilon batok kay anay Iloilo Provincial Administrator Manuel “Boy” Mejorada.
Ini ang may kaangtanan sa apat ka write-ups ukon news article nga ginsulat ni Mejorada batok sa mga proyekto nga ginpatuman ni Drilon nga ginapahayag overpriced ukon tuman ka mahal kasubong sang Iloilo Convention Center, Iloilo Circumferential Road sa Ungka, Pavia kag Guimaras Iloilo Parola Terminal Ferry Project.
Ini matapos nga nagpaguwa ang desisyon ang Court of Appeals nga guilty si Mejorada bangud nga nagaguwa nga ginapersonal na sang anay Provincial Adminsitrator si Sen. Drilon.
Sa interview sang Bombo Radyo kay Atty. Leo Superio sang Integrated Bar of the Philippines, iya ginpahayag nga mabug-at nga pamatbat ang ginapangatubang ni Mejorada bangud nga nagpareho ang desisyon sang RTC kag CA.
Bisan pa nga magpasaka sang Motion for Reconsideration si Mejorada sa Supreme Court apang mas patihan sang SC ang desisyon sang RTC kag CA.
Kun makapaguwa na sang pinal nga desisyon, mahimo na nga makapaguwa sang warrant of arrest batok kay Mejorada.
Ang tagsa ka count sang Libel  case ang may yara sang silot nga prision correctional ukon indi magnubo sa duha ka tuig kag apat ka bulan nga pagkapreso kag ini ang dululungan nga ipatuman.
Buot hambalon suno kay Superio, dungan nga pagaserbehan ni Mejorada ang silot nga igahatag sa iya magluwas lang kun magdesisyon ang korte nga ang tagsa ka kaso ang may yara sang nagkalain lain nga kalawigon sang silot.