ILOILO – Isa ka anay Ilonggo seaman ang nangin madinalag-on nga nagbaliskad sang iya banas agud sundan ang iya handom sa musika kag pelikula.
Ini amo si Aleck Calata, sang Población Ilawod, Passi City.
Si Calata ang nagtapos bilang bilang honor student sa kurso nga Bachelor of Science in Marine Transportation sa John B. Lacson Foundation Maritime University – Arevalo.
Sa interview sang Bombo Radyo kay Calata, iya ginpahayag nga antes nagsulod sa musika, nangin marino anay ini sa diin nakalayag na ini sa nagkalain-lain nga bahin sang kalibutan.
Apang sa pihak sang madinalag-on nga karera sa industriya sang maritime, wala niya ginbayaan ang hilig sa sining kag musika.
Si Calata ang isa na subong ka recording artist nga may duha ka mga kanta nga Ganito Ba Dapat? kag Right Love.
Magluwas diri, aktibo man siya sa paghimo sang musika para sa pelikula bilang music supervisor sa grupo nga Cineastas A Vela, isa ka filmmaking team nga kinikilala indi lang sa Pilipinas kundi mangin sa iban nga pungsod.
Ang mga komposisyon naman sini nga Dalagan kag Singkal ang ginkilala man bilang Best Music kag Best Original Score sa Cinekasimanwa 6 kag 7.
Sa patag naman sang acting, gindala sini ang papel ni Humadapnon sa pelikula nga Sa Paglupad Ka Banog, nga nagdaog sang Golden Kinabalu Award for Best Indigenous Language Film sa 13th Kota Kinabalu International Film Festival 2022 sa Malaysia kag Best Short Film sa Gawad Urian 2023.
Bangud sa iya talento, ginkilala man siya bilang Philippine Young Achievers Awardee para sa 2024 kag 2025.
