ILOILO CITY – Kapin duha ka semana na nga ginamonitor sang mga otoridad ang isa ka anay pulis antes ini madakpan sa drug buy bust operation sa Barangay San Pedro, Molo, Iloilo City.
Ang suspek amo si Joel Destacamento, 55 anyos kag residente sang Veterans Village, Iloilo City Proper.
Sa interview sang Bombo Radyo sa pinuno sang Regional Police Drug Enforcement Unit Team 3, iya ginpahayag nga tuso nga durugista ang subject bangud may background ini sa Philippine National Police (PNP) bangud nakaagi ini serbe bilang imbestigador sang La Paz Police Station.
Suno sa natungdan, nag-AWOL ang nasambit nga subject sa serbisyo sa PNP sang 2005.
Sa imbestigasyon sang otoridad, wala naga-transact si Destacamento sa indi niya kakilala. May dala man ini nga puti nga van kun magpagpatigayon sang iligal nga operasyon.
Nahibaluan nga kagab-i, Setyembre 20, nadakpan ang suspek matapos mabaklan sang isa ka daku nga sachet sang suspected shabu kag buy bust money nga nagdangat sa P17,200.
Yara subong nakahunong sa Molo Police Station ang arestado. #
