JANIUAY, ILOILO – Ginpamatbatan sang perpetual disqualification kag pagkapreso sang 6 ka tuig kag isa ka adlaw tubtub 10 ka tuig si anay Mayor Frankie Locsin sang Janiuay, Iloilo.
Ini ang kasunod sang ginpaguwa nga desisyon sang Sandiganbayan sa kaso nga ginpasaka batok kay Locsin bangud sa paglapas sa Republic Act 3019 ukon Anti-Graft and Corrupt Practices Act may kaangtanan sa pagbakal sang bulong nga nagabalor sang P15 million.
Sa interview sang Bombo Radyo kay Atty. John Nuñez, legal counsel ni Vice Mayor Jojo Lutero, iya ginpahayag nga ginbasura sang Korte Suprema ang Motion for Reconsideration ni Locsin kag sa baylo, ginpaboran ang resolusyon sang Sandiganbayan nga napetsahan sang Pebrero 23 kag Hunyo 8, 2015.
Nagpaguwa sang Entry of Judgements ang Korte Suprema sadtong Marso 20, 2019 kun sa diin final and executory na ang desisyon sang Sandiganbayan batok kay Locsin kag sa pila ka mga municipal official sang Janiuay, Iloilo.
Nahibalu-an nga una nga nagpasaka sang disqualification case ang makasumpong ni Locsin sa pagka-alkalde nga si Vice Mayor Jojo Lutero bangud sa isyu sang dual citizenship sang anay alkalde.
