Ginpangalanan ang anay kadre sang Communist Party of the Philippines – New People’s Army (CPP-NPA) kag subong consultant sang National Task Force to End Local Communist Armed Conflict nga si Jeffrey Celiz ang pila pa ka nabilin nga mga lideres sang rebelde nga grupo nga mahimo magpadayon sa pagsabwag sang kalakasan sa Panay Kag Negros.
Kasunod ini sang kamatayon sang pila ka mga high-ranking officials sang rebelde nga grupo sa natabo nga serye sang mga encounters sa Calinog kag Lambunao.
Sa interview sang Bombo Radyo kay Mr. Jeffrey Celiz ukon si Ka Erik, iya ginpahayag nga samtang nagahimumugto na ang rebelde nga grupo, may pila sa gihapon ka mga myembro sini ang nagaserbe nga lideres kag mag-sustain sang ila mga aktibidad.
Ini amo ang mga masunod:
1.Roberto Ted Cabales nga taga- Negros kag anay guerilla front secretary kag kapin apat ka dekada na sa hublag
2.Gaspar “Mayok” Matuliano nga taga Maasin kag ginapahayag nga may ginasuprir nga tuberculosis
3.Josephine Para Porquia nga asawa sang ginpatay nga si Joerey Porquia kag ini man ang nagpamuno sang Regional Urban Party Committee
4.Jose Edwin “Bebot” Guillen “alyas Arsen” nga taga- Igbaras kag ginpahayag nga notoryus nga extortionist kag manugpanunog sang equipment kag nagserbe nga deputy secretary for finance ni Reynaldo Bocala nga bana ni Concha Araneta
5.Cirila Estrada “alyas Laon” nga nadakpan na sadto apang nakagwa
Ginpahayag naman ni Celiz nga apisar mahimo magtindog nga mga lideres ang nasambit nga mga indibidwal, indi mapag-on ang nasambit nga lima ka mga myembro sang rebelde.
Bangud sini, ginalantaw ni Celiz ang posibilidad sang pagpadulong sa Western Visayas sang pila ka mga rebel leaders sa Central Committee nga sanday Jessie Lepura, Tomas Dominado, kag Adora Predevera agud pamunuan ang komunista nga grupo.
