Buka ang windshield sang isa ka unit sang modernized jeepney sang Metro Iloilo Transport Service Cooperative (MITSCOOP) matapos nga ginlampusan sang ila anay katapo nga Public Assistant Officer ukon konduktor.
Sa interview sang Bombo Radyo kay Juvy Barreto, Vice Chairman sang Metro Iloilo Transport Service Cooperative, iya ginpahayag nga Enero 31 sang nag-resign ang amo nga konduktor apisar nga wala naghatag sang iya rason sa paghalin.
Suno kay Barreto, malapit isa ka tuig nga nagserbisyo sa ila ang konduktor antes natabo ang insidente.
Apisar sini, gintuad sang natungdan nga ginpolpog sang konduktor sang basiyo sang soft drinks ang right side nga windshield sang modernized jeepney rason man nga nabuka.
Gin-athag man sini nga wala sang komosyon nga natabo sa tunga sang driver kag sang amo nga konduktor, antes paman nagluntad ang insidente.
Nagpa-blotter naman ang driver sang modern jeep agud nga kon hinali nga magliwat ang insidente, indi na madalahig pa ang mga pasahero.
Ginaalegar nga may dumot ang koonduktor sa driver rason nga nahimo sini ang amo nga akto.
Ipatawag kag ipabayad naman sa resigned Public Assistant Officer ang mga naguba sini.
Ginahulat naman sang Iloilo City Police Station (ICPS) 9 nga makompleto sang tagreklamo ang mga requirements agud nga mapasaka ang kaso batok sa konduktor.
Suno kay PCPT Gimel Acuesta, hepe sang Iloilo City Police Station (ICPS) 9, naguwa nga ginpamahog sang konduktor ang driver pamaagi sa mga tinaga antes ginlampos ang bitbit sini nga botelya sa wind shield.
Gilayon naman nga nagpalagyo ang konduktor matapos nga na-damage ang P20,000 nga balor sang wind shield.
Ginahulat na lang sang talatapan nga magbalik ang driver sang MITSCOOP agud nga matigayon proseso ang ipasaka nga kaso malicious mischief kag grave threat.
