Wala ginlauman sang anay live-in partner sang suspek nga nagpatay sa isa ka tigulang sa Ledesco Village, Barangay Tabuc Suba, Lapaz, Iloilo City, nga mahimo sini ang amo nga krimen.
Sa interview sang Bombo Radyo kay Juvylyn Villasis, anay live-in partner sang suspek nga si Jerry Monahan Lima, iya ginpahayag nga ginkakibot sini ang amo nga hitabo bangud sa 13 nila ka tuig nga pag-upod bilang live-in partners nakilala sini si Lima bilang hipuson nga kalse sang tawo.
Pahayag pa sini nga maayo man ang pagtamdanay nila sang tigulang sang una kag ginadul-ungan pa nila ini sang pagkaon kada may selebrasyon sa ila balay.
Ginpahayag man ni Villasis nga wala sang seryoso nga pagbinaisay nga natabo antes sang insidente.
Apang sang Marso 2025, nagpangabay si Lima nga mahulam ini kuntani sang P10,000 sa tigulang kag si Villasis ang magabayad sini.
Nagpamalibad ang tigulang bangud suno sa iya wala kahambal ini nga si Villasis mismo ang mabayad sang kwarta.
Bangod sini, suno kay Villasis, naglain ang buot ni Lima kag naghambal pa ini nga patyon niya ang tigulang.
Sa matandaan nga sang Mayo 24, natabo ang amo nga krimen matapos nga nagsulod ang suspek sa balay sang tigulang kun sa diin nakita pa sa CCTV footage sang anak sang biktima, kun paano ginpatay ang tigulang pinaagi sa pagkuga antes gintapak-tapakan pa ini sang suspek.
Matapos ang insidente, ginkuha pa sang suspek ang cash kag mga alahas sang biktima.
