ILOILO — Nagsungka ang anay mga myembro sang Napoleon Tumagtang Command ukon Southern Panay Front, Komiteng Rehiyon Panay sa 61ST Infantry Batallion paagi sa bulig ni Tubungan Mayor Roquito Tacsagon.
Ini amo si Ka Aurora Malaya, 25, residente sang Tubungan, Iloilo, anay spokesperson kag political guide sang nasambit nga communist group kag ang iya live-in partner nga residente sang Leon, Iloilo.
Sa interview sang Bombo Radyo kay Lieutenant Colonel Arturo Balgos, commander sang 61st Infantry Batallion, iya ginpahayag nga bangud sa kapigaduhon kag mabudlay nga pangabuhi sa bukid, napilitan nga magsungka ang amo nga mga rebelde.
Suno kay Balgos, kapin pito ka tuig nga nagserbisyo si Ka Aurora sa amo nga grupo nga sa subong, yara na lamang sa pito ang nabilin sa ila nga mga kaupdanan.
Ginpahayag man ni Balgos nga may kaupdanan man siya nga luyag kuntani nga mag-surrender apang nahadlok sila bangud sa ginapunggan ini sang ila nga leader.
Una na nga gindeklara sang Armed Forces of the Philippines (AFP) nga na-dismantle ang Southern Panay Front, Komiteng Rehiyon Panay.
Apang sa pinakaulihi nga natabo nga engkwentro sa Leon, natumod nga ginbuligan sila sang grupo sang Regional Sentro de Gravidad (RSDG) sa diin naglab-ot sa 30 ang natumod nga mga rebelde.
Sa subong, padayon nga gina-track down sang katapo sang gobyerno ang mga nabilin nga rebelde sa kabukiran sang Panay.
Nagpanawagan naman ang mga nagsungka nga rebelde sa ila mga kaupdanan nga magsungka naman agud makalikaw sa posible nga matabo sa ila samtang nagapakigbato batok sa gobyerno sang Pilipinas.
