Napamatud-an sang isa anay ka myembro sang rebelde nga grupo nga si Jenamie Tacanloy nga wala sang kamatuoran ang pangako sang mga NPA nga mangin masulhay ang imo kabuhi kun ikaw magasulod sa ila nga sabak.
Sa interview sang Bombo Radyo kay Tacanloy, iya ginpakigbahin ang iya mga personal nga na-eksperyensyahan kun paano siya narecruit nangin parte sang rebelde nga grupo.
Suno sa iya, nagsugod ini bangud sang problema pinansyal, kag gin-brainwash ini nga magabag-o ukon mangin manami ang kabuhi sini kun magasulod ini sa grupo.
Ginhambalan siya nga bisan mag-eskwela ukon makatapos pa ini sa iya nga pagtuon, wala man sang may matabo nga pagbag-o sa iya kabuhi bangud indi man manami ang pagpang-gobyerno sa pungsod.
Nagpabilin si Tacanloy sa rebelde nga grupo sa sulod sang isa ka tuig kag tunga.
Suno sa iya, sa una manami pa ang pagtratar sa ila, apang sang nagdugay, ato na kag ila nahibaluan ang kamatuoran sa ila pagsulod sa rebelde nga grupo.
May mga tion nga sa isa ka adlaw indi sila kakaon, kag saging lamang ang ila ginakaon.
Ginpakigbahin man ni Tacanloy ang isa sa pinakamasakit nga eksperyensya niya samtang yara siya sa ambush position, nga kinahanglan magpanaw sang bilog nga adlaw agud makapalagyo.
Nadesisyuan na lang sini nga maghalin sa rebelde nga grupo sang nagbusong na ini sang isa ka bulan.
Suno pa sa iya nga amo ini ang nagtulod sa iya nga planuhan ang iya pagpalagyo.
Ginpakigbahin pa sini nga mahapos ang pag-recruit sa armado nga grupo, apang tuman gid kabudlay ang pagguwa.
Pagkatapos sang ila pagpalagyo, nagkadto sila anay sa Manila sang iya partner kag nagtinir didto sang anum ka bulan.
Pagkatapos sadto nagpakig-coordinate sila sa ila LGU agud malimpyuhan ang ila pangalan agud makapangabuhi na sila sang matalunsay.
