ILOILO CITY – Nagakinahanglan sang determinasyon agud nga malab-ot ang handum nga waist line kag kurba sang lawas.
Ini panugyan sang anay overweight nga si Michelle Horlador sang Janiuay, Iloilo.
Sa interview sang Bombo kay Horlador, iya ginpahayag nga magluwas nga mahilig ang iya pamilya sa pagluto, sulundon pa gid sa ila ang pagkatambok.
Bangud man sa iya hilig sa pagkaon kag kakulang sa exercise, naglab-ot sa 83 kilos ang iya bug-at nga makabig nga overweight.
Bangud sa katambukon, ginpahayag ni Horlador nga sang naga-edad pa lang siya sadto sang 28 anyos, may yara na siya sang High Blood pressure kag nanari-sari nga balati-an sa lawas.
Isa man sa mga rason sang tuman niya nga pagtambok amo ang pagpatama sa pagkaon.
Bangud sa iya ginabatyag nga balati-an, ginpanugyan sang doktor sa iya nga magpabuhin sang bug-at sa sulod sang pila ka bulan.
Sang una suno kay Horlador, mabudlay ang pagpaniwang apang iya lang nga ginpadayon ang pagdisiplina sa pagkaon.
Kun sadto suno sa natungdan, tuman ka damu sang iya food intake apang sa subong, iya na ini nga ginbuhinan.
Magluwas sa pagbuhin sang food intake, naga-exercise man siya sa tagsa ka adlaw agud nga mabuhinan ang calories sa iya lawas.
Ginpahayag sang natungdan nga wala sang mala-in sa pagkatambok apang kun wala naman nagasanto ang bug-at sa edad, indi naman ini makabig nga healthy lifestyle.
Wala sang mabudlay suno kay Horlador kun may yara sang handum sa kabuhi.
