ILOILO CITY – Nagalaom ang anay katapo sang Philippine constabulary nga madugangan ang ila ginbaton nga pension kag indi na pagpadayunon sang gobyerno ang ginaduso nga pagbag-o sang military and uniformed personnel retirement and pension system.
Sa interview sang Bombo Radyo kay former 2nd Lieutenant Antonio Soliman sang Philippine Constabulary, iya ginpahayag nga 25 ka tuig siya sa serbisyo sa diin gin-assign siya sa Western Visayas.
Sa subong nga nagretiro na ini, nagalaom naman ang natungdan nga mabayluhan man sang gobyerno ang ila maayo nga pagserbisyo sadto para sa pungsod.
Ini ang sa tunga man sang ginaduso ni Finance Secretary Benjamin Diokno nga mailisan ang sistema sa paghatag sang pension.
Ang ini nga proposal ang aprubado man ni President Ferdinand “Bongbong” Marcos Jr. sa diin katuyuan sini nga malikawan ang “fiscal collapse” sang gobyerno ilabi na subong nga pandemya.
Matandaan nga ginpahayag ni Diokno nga mapyerde ang gobyerno sa tion nga padayunon nila ang paghatag sang pension sa mga nagretiro na nga mga anay katapo sang gobyerno bangud wala naman ang mga ini sang ginahimo nga contribution.
