Gin-aresto ang anay police major kag ang iya driver kaangot sa pagkadula sang beauty queen nga si Catherine Camilon sa Balayan, Batangas.
Suno sa Police Regional Office 4A, una nga gindakop si Police Major Allan de Castro 7:47 sang Sabado sang gab-i, Septyembre 14, sa Barangay Caloocan sa amo nga banwa samtang makaligad ang isa ka oras, gindakop man ang iya driver-bodyguard nga si Jeffrey Magpantay.
Nagapangatubang ang duha sang kaso nga kidnapping and serious illegal detention bangud sa ginaalegar nga involvement sa wala pa gihapon nasolbar nga pagkadula sang beauty queen sang 2023.
Matandaan nga sang Mayo 15, una na nga ginbasura ang mga reklamo batok sa mga suspek bangud sa kakulang sang mga ebidensya, apang ginpasaka liwat ang kaso sa Batangas Regional Trial Court kag wala sang gina-rekomendar nga pyansa.
Matandaan nga may hearings man anay sa Kongreso kaangot sa amo nga insidente kun sa diin gindagdagan pa sang contempt order si de Castro bangud sa pagbinutig rason nga gin-detain ini sa Senado apang duha ka adlaw ang nakaligad, ginpaguwa man ini ni Senator Bato dela Rosa base sa “humanitarian” grounds.
Pamilyado si De Castro kag wala sini ginaako nga karelasyon niya si Camilon, apang base sa reports, sila nga duha ang magakit-anay antes nakumpirma nga missing ang babaye.
Ulihi nga nakit-an ang biktima sa CCTV camera nga naglabay sang Oktubre 12, 2023 sa pila ka banwa sa Batangas.
Sunod nga may nagguwa nga mga testigo nga nakit-an nila ang duguon nga lawas ni Camilon nga ginsaylo halin sa isa ka salakyan pakadto sa isa pa ka salakyan sang amo mismo nga adlaw.
Na-recover ang abandonado nga salakyan kag sang ginpaidalom sa test ang dugo kag buhok nga nakit-an sa lugar, nagsanto ini sa DNA profile sang mga ginikanan ni Camilon. Indi maathag tubtub subong kun patay na ukon buhi pa ang beauty queen.
