ILOILO CITY–Nakuhaan sang nagkalain-lain nga sahi sang bala ang anay punong barangay nga si Romanito Gratis alyas “Morit”, 69 anyos, sang Pali-Benedicto, Mandurriao, Iloilo City.
Ini matapos nga nagserbe sang search warrant ang Mandurriao PNP sa balay ni Gratis.
Sa interview sang Bombo Radyo kay Police Chief Inspector Engelbert Banquillo, hepe sang Mandurriao Police Station, iya ginpahayag nga ginserbe ang search warrant bangud may yara sang armas nga ginahuptan ang anay punong barangay kag bilang pagsunod man sa order sang Police Regional Office (PRO) 6 nga tokhang kontra sa iligal nga armas.
Ginapahayag nga wala sang lisensya ang mga armas luthang ni Gratis.
Posible naman nga magapangatubang sang kaso nga illegal possession of firearms and ammunitions ang anay punong Barangay.
Ginpahayag naman ni Punong Barangay Gratis nga ang nakuha nga 12 gauge shot gun ang may lisensya sang una apang wala na-renew.
Pahayag pa ni Gratis, indi man iya ang armas kag sa iya lang ginpangalan ang lisesnya.
Nahangpan naman sang Punong Barangay nga katungdanan sang mga pulis nga dakpon ang mga nagahupot sang indi lisensyado nga armas.
Nakahanda naman si Gratis nga atubangon ang kaso nga ipasaka sa iya.