Natalana nga pasakaan sang kaso nga murder ang isa ka anay rebelde matapos sini ginluthang-patay ang iya kaugalingon nga tiya sa Barangay Jamog Gines, Leon, Iloilo.
Ang biktima amo si Mildred, 54, samtang ang suspek amo si alias Bugok, 40, lunsay residente sang amo nga lugar.
Sa interview sang Bombo Radyo kay Police Captain Predic Padilla, officer in charge sang Leon Municipal Police Station, iya ginpahayag nga yara sa sulod sang balay ang biktima kaupod ang iya pamilya sang hinali nga ginluthang sang suspek kag napilasan gid ini sa likod nga rason sang iya kamatayon.
Sa bulig sang barangay officials kag 1st Iloilo Provincial Mobile Force Company, nagsungka man ang suspek sa otoridad dala ang iya pusil nga gingamit sa krimen.
Sandig sa inisyal nga mga impormasyon, sang nagligad nga semana, may yara sang indi paghangpanay sa tunga sang tiya kag hinablos bangud sa pula nga cellphone case sang biktima nga wala nagustuhan sang suspek.
Makaligad ang amo nga indi pag-intindihanay, ginpahayag nga pila ka adlaw pa nga nadula ang suspek antes sini ginhimo ang krimen sang nagligad nga Martes sang gab-i.
Ginahibalo pa kun may dugang pa nga motibo sa ginhimo sini nga krimen.
May kumpirmayon man halin sa Philippine Army nga isa ka anay rebelde si alias Bugok kag duha ka tuig na ang nakaligad, nagbalik ini sa sabak sang gobyerno paagi sa Enhanced Comprehensive Local Integration Program ukon E-CLIP.
