ILOILO CITY- Ginpamatbatan sang anom ka tuig nga pagkabilanggo ang anay broadcaster sang RMN Iloilo nga si Rhoderick “Rhod” Tecson.
Ang pamatbat ang ginpagwa sa desisyon ni Judge Victorino Oliveros Maniba Jr. sang Branch 39 sang Regional Trial Court sa kaso nga paglapas sa Section 4 sang Republic Act No. 10175 ukon Cybercrime Prevention Act.
Ini nga kaso ang ginpasaka ni Dr. Rogelio M. Florete, Chairman sang Florete Group of Companies.
Sa madumduman, ginyawyaw kag ginpakalain ni Rhod Tecson ang pagkatawo ni Dr. Florete sa iya programa sadto sa RMN Iloilo sa tunga sang gintalakay sini nga isyu sa tunga sang Flowater Resources Iloilo Inc. kag sadto Metro Iloilo Water District (MIWD).
Magluwas sa pamatbat nga pagpapreso, ginapabayad man si Rhod Tecson sang:
- P200,000 para sa Moral damages;
- P200,000 para sa Exemplary damages kag
- P100,000 para sa Attorney’s fee.
Sa interview sang Bombo Radyo kay Dr. Rogelio Florete, iya ginpahayag nga leksyon ini sa tanan nga mga katapo sang broadcast industry nga mangin responsable sa pagbuya sang mga tinaga kag gamiton ang prebilihiyo nga makauyat sang mikropono sa husto nga pamaagi.
Suno kay Dr. Florete, hangin ang medium nga ginagamit sa industriya sang radyo apang ini nga hangin ang indi dapat pagpasakaon sa ulo.
