ILOILO CITY- Wala nadutlan sa kaso nga murder ang bilog nga pamilya ni anay San Dionisio, Iloilo Mayor Peter Paul Lopez angot sa pagpatay sa negosyante nga si Claire Diergos.
Base sa desisyon sang Iloilo Provincial Prosecutors Office, ang nalakip lang sa nakit-an nga may probable cause nga pasakaan sang kaso amo sanday Raffy Sorioso alias Nonoy; Gardo Ibrahim, nga may bansag man nga Gardo, Muslim, kag Yusof; kag si Ma. Rudelyn Sumbong nga timbang ni Diergos.
Matandaan nga kalakip sa ginpasakaan sang murder complaint amo sanday Peter Paul Lopez, asawa nga si Saliha Lopez alias Sally kag mga anak nga sanday Felix Paul Lopez, Carlos Paul Lopez, kag Christian Paul Lopez.
Si PMajor Rolando Araño,hepe sang Pavia Municipal Police Station amo ang nagpasaka sang kaso nga murder sa idalom sang Article 248 sang Revised Penal Code (RPC) kasunod sang complaint ni Samuel Diergos nga amay ni Caire.
Si Claire ang negosyante nga nasapwan sa sulod sang sports utility vehicle (SUV) sang Oktubre 26 sa Brgy. Inangayan, Sta. Barbara, Iloilo.
May yara ini sang madamo nga pilas sa lawas tuga sang pagkabuno kag gin-gulgol pa ang liog sini.
