Maga-sambuwa na subong nga adlaw ang Pinoy boxer nga si Jerwin Ancajas kag ang Japanese World Boxing Association (WBA) bantamweight champion nga si Takuma Inoue.
Balantayan ang hampang sa Kokugigan Arena sa Japan, 5:00 karon sa hapon oras sa Pilipinas.
Apisar mas malawig na ang eksperyensya sang 32-anyos nga si Ancajas ukon Pretty Boy sa sulod sang ring, ginakabig ini nga underdog batok sa 28-anyos nga si Takuma nga manghod sang Japanese undisputed super-bantamweight king nga si Naoya Inoue.
Sa official weigh-in kahapon nga adlaw, pareho nga 117.75 pounds ang kabug-aton sang duha ka boksidor.
Una na nga ginpahayag sang anay Pinoy world champion nga luyag niya nga takson ang pasensya ni Takuma bangud nakit-an niya nga naga-agresibo gilayon ini sa away sa tion nga maigu sang inumol.
Si Ancajas ang naga-uyat anay sang International Boxing Federation junior bantamweight crown halin sang 2016 tubtub sang 2022 antes ini nalutos sang duha ka beses sa kamot ni Fernando Martinez sang Argentina.
Naga-uyat ini sang rekord nga 34-ka daog kun sa diin 23 ang knockouts, 3-ka kalutusan, kag 2-ka draw, samtang may 18 ka daog kag isa ka kalutusan si Takuma kun sa diin apat ang iya na-knockout.
Wala nagpromisa ang Pinoy boxer nga matumba sini ang Japanese fighter apang nagpasalig sini nga ibubo niya ang tanan agud nga indi na maglab-ot pa sa 12 ka rounds ang ila sambuwa sa atubang sang Japanese fans.
Pananglitan magdaog si Ancajas, may world champion na liwat ang Pilipinas sa patag sang boksing.
Una nga na-schedule ang away sang duha sang Nobyembre 2023 apang na-postpone bangud sa injury ni Takuma sa training.#
