ILOILO CITY – Ginkasubo ni Regional Assemblyman Zia Alonto Adiong nga amu man ang tagpamaba sang provincial government sang Lanao del Sur, kag sang iya pamilya ang pagkapulbos sang ila ancestral house sa Marawi City.
Suno kay Adiong sa interview sa Bombo Radyo, siya mismo ang isa man ka evacuee subong, sa diin ang ginasuksok lang nga pantalon kag sapatos, walo ka T-shirts kag lima ka underwears ang iya nasalbar.
Ini matapos nga ginbombahan sang otoridad ang ila puluy-an matapos nga nakita sa litrato nga kuha sang drone, nga may nagasulod nga mga tawo nga naka-itom sang panapton nga ginapatihan miyembro sang Maute group sa ila balay.
Ginpahayag ni Adiong nga emosyunal ang ila pamilya bangud gintukod pa ang ila ancestral house sang 1950s, kag handumanan sang pagpakigbato sang iya nga lolo batok sa Martial Law ni anay Presidente Ferdinand Marcos.
Naga-apelar man ini nga ang ground troops na lang kuntani ang makigbato sa Maute group agud mas gamay ang halit nga matuga.
Dugang pa sini, ang paggamit sang air asset ang delikado para sa mga sibilyan nga na-trap pa sa Marawi City kag pagkaguba sang mga propiedad.