Gin-anunsyo sang Film Academy of the Philippines (FAP) nga napilian ang documentary nga “And So It Begins” bilang official entry sang Pilipinas sa 97th Academy Awards sa idalom sang Best International Feature category.
Base sa Oscars, ang international film isa ka feature-length motion picture (masobra 40 minutos) nga gin-produce sa guwa sang United States of America kag mga teritoryo sini nga may masobra 50% nga non-English dialogue track.
Pareho nga ginapahanugutan ang animated kag documentary feature films.
Base sa Screen Daily, 15 finalists ang ibutang sa shortlist kag iga-anunsyo sa Disyembre 17; kag halin sa 15, may lima ka final nominees nga iga-anunsyo naman sa Enero 17, 2025.
Matabo ang 97th Academy Awards sa March 2, 2025, US time, sa Dolby Theatre sa Los Angeles.
Ang “And So It Begins” ni Director Ramona Diaz nagapakita sang “pink” movement nga nabuhi sang ginlunsar ang presidential bid ni former vice president Leni Robredo sang 2022 national elections.
113 minutos ini nga documentary kag naga-feature man sa Nobel Peace Prize laureate nga si Maria Ressa sa iya pagpakigbato sa press freedom sa tion nga nagapanglakaak gid ang disinformation.
Sang Agusto, ginpaguwa man ini sa Cinemalaya Independent Film Festival kag sa limited number sang sinehan sa pungsod.
Antes na-screen sa Pilipinas, ang documentary nga ini ang nag-debut sa Sundance Film Festival sang Enero.
Matandaan nga ang official entry sang Pilipinas sa 96th Academy Awards amo ang Filipino-Ilocano animated film nga Iti Mapukpukaw ni Carl Joseph Papa.
