Napaslawan ang official entry sang Pilipinas nga makasulod sa shortlists para sa palaabuton nga seremonya sang 2025 Academy Awards ukon Oscars.
Ang “And So It Begins” nagatuyo kuntani nga maka-upod sa kategorya nga International Feature Film kag Documentary Feature.
Bangud sini, padayon gihapon ang paghulat sang mga Pinoy nga ma-nominate ang labing-una nga Filipino movie sa sini nga prestihiyoso nga awards ceremony.
Ang “And So It Begins” ni Direk Ramona Diaz amo ang una nga tion nga nag-field ang Pilipinas sang documentary sa Academy Awards halin sang nagsugod ini sa pagpadala sang entries.
Ini nga dokumentaryo ang nagasentro sa “pink” movement ni former vice president Leni Robredo sa iya presidential bid sang 2022 national elections kag istorya sang journalist kag Nobel Peace Prize winner nga si Maria Ressa sa iya pagpakigbato para sa press freedom.
Ini man ang pang-apat nga tion nga babaye ang nag-direct sang entry sang Pilipinas kasunod kanday Marilou Diaz-Abaya para sa “Karnal,” “Milagros,” kag “Sa Pusod ng Dagat”; Rory Quintos para sa “Anak”; kag Hannah Espia para sa “Transit.”
Sa subong nga tuig, ang frontrunners sa International Feature Film category amo ang “Emilia Perez” halin sa France, “I’m Still Here” halin sa Brazil, “Kneecap” halin sa Ireland, “Vermiglio” halin sa Italy, “From Ground Zero” halin sa Palestine, kag “How to Make Millions before Grandma Dies” halin sa Thailand.
Sa pihak nga bahin, maga-compete naman sa Documentary Feature category ang “Will & Harper” kag iban pa nga Netflix-distributed entries kaangay sang “Daughters” kag “The Remarkable Life of Ibelin.”
Patigayunon ang 97th Academy Awards sa Los Angeles, California sa March 2, 2025 (March 3 PHT).
