Nagakadapat nga hulaton anay sang Commission on Audit (COA) nga matapos ang isa ka proyekto bag-o magpagwa sang audit report.
Ini ang panindugan ni Chief Presidential Legal Counsel Atty. Salvador Panelo bilang pagsuporta sa pahayag ni Presidente Rodrigo Duterte nga untaton sang COA ang pagpagwa sang government transactions samtang wala pa natapos bangud ginatunaan ini sang madamo nga huring-huring halin sa nagkalain-lain nga panan-awan sang mga tawo.
Sa interview sang Bombo Radyo kay Secretary Panelo, iya ginpahayag nga kuntani indi anay magpatigayon sang audit ang COA sa mga nagapadayon nga proyekto sang gobyerno bangud indi ini patas para sa mga katapo sang gobyerno.
Suno kay Panelo, mahimo nga ‘kamatuoran’ na ang panan-aw sang iban sa mga ginapaggwa sang COA bisan preliminary audit pa lang ini.
Bangud man sini suno kay Panelo, indi lang isa ka ahensya sang gobyerno ang nagakaapektuhan.
