Bata pa lang, nagpakita na sang iya tumalagsahon nga abilidad sa pagsaot ang Ilonggo Choreographer nga si Steven Jacosalemn sang Grand Slam Champion nga Tultugan Festival sa Kasadyahan sa Kabanwahanan 2026 kag sang Tribu Salognon nga amo naman ang nagkampeon sang Dinagyang 2026 Tribes Competition.
Sa pagpakigbahin ni Steven Jacosalem sang iya istorya sa Bombo Radyo, iya ginpahayag nga halos wala sang tuig nga nagligad nga wala ini makabaton sang award sang bata pa ini bangud sang iya talento sa pagsaot.
Nagsugod si Jacosalem bilang isa ka bulilit dancer, kag nag-participate ini sa nagkalain-lain nga kompetisyon bilang isa ka performer.
Halin sa iya pagkabata, ginpabakod sini ang iya talento asta nga nakaangkon ini sang grand slam victory paagi sa Tribu Paghidaet sadto.
Suno kay Jacosalem, bata pa lang ini ginapadala na ini sa iban nga mga lugar, kaangay sang Palawan, agud magtudlo sang pagsaot kag magpakigbahin sang iya nahibaluan sa iban.
Dugang pa ni Jacosalem, indi mahapos ang iya una nga pagsugod sini sa iya karera apang bangud sang bulig sang mga tawo nga nagapati kag nagasuporta sa iya, nangin mas mahapos ang iya pag-atubang sang mga kabudlayan nga nag-abot sa iya kabuhi.
Suno pa sa iya nga wala sang impossible sa isa ka tawo nga naga-focus sa ila mga handum bangud kun ang imo nga goal isa ka mataas dapat mo ini pangabudlayan kag tinguhaan nga maangkon.
Dako man ang iya pagpasalamat sa mga tawo nga nangin mentor sini bangud isa siya ka produkto sang ila maayo nga pagtudlo.
Ginsaysay man niya nga sang tion sang preparasyon para sa Dinagyang Festival 2026 tuman ang kabudlayan sini nga iya na-eksperyensyahan kag na-overwhelm gid ini kag maya ara pa sang tyempo nga kaangay nga nadulaan na ini sang kusog.
Nagpadulong ini sa simbahan agud mangamuyo kag liwat nga gin nanagin maayo ang Ginoo sa iya bangud pagkatapos sang duha ka adlaw nga pagpahuway kag pagpangamuyo, gin pamatian ini sang Diyos.
Suno pa sa iya, ang kadalag-an nagadepende gid sa preparasyon, kag ang pinakadaku nga fulfillment para sa ila amo ang makita nga gin-appreciate sang katawhan ang ila ginpangabudlayan.
Dugang pa niya nga indi matakos ang ila kalipay nga mabatyagan ilabi na kun sila ang palakpakan sang mga tawo nga nakasaksi sang ila sakripisyo kag kabudlayan sa kada kompetisyon nga sila kabahin.
