Isa ka giyera batok sa political dynasties ang gina-atubang sang subong nga henerasyon sang mga Pilipino.
Ini ang ginpahangop sang isa ka constitutional law expert kag political analyst nga si Atty. Michael Henry Yusingco kadungan sang selebrasyon subong nga adlaw, Agusto 25, sang National Heroes Day kun sa diin ginakilala ang mga sakripisyo sang mga baganihan para sa kahilwayan kag dignidad sang Pilipinas.
Sa interview sang Bombo Radyo kay Yusingco, ginpahayag sini nga ang mga dynastic politicians ukon ang magpamilya nga naga-uyat sang gahum sa pulitika amo ang yara sa likod sang pork barrel campaign ukon pork barrel cartel sa Kongreso.
“Itong mga dynastic politicians na ‘to —that is our war now, our revolution now. Tayong mga regular lang na mga Indio, ang kalaban natin itong mga political dynasties kasi sila talaga ang nasa likod ng pork barrel cartel. Sila ang pork barrel cartel sa totoo lang,” pahayag sini.
Sang 2013 pa sang gindeklarar sang Supreme Court en banc nga unconstitutional ang Priority Development Assistance Funds (PDAF) ukon ang congressional pork barrel. Sang amo nga tion, nagguwa ang mga pagpakamalaot sa sini nga pondo kasunod sang special report sang Commission on Audit (COA) nga nagbulgar sang gross misuse sa funds sang mga mamalidha.
Apang suno kay Yusingco, may pork barrel man gihapon subong ang mga legislators sa porma na sang budget insertions.
Pahayag pa sang abogado, kun yara na ang dynastic politicians sa Kamara kag Senado, pat-od nga ang direksyon nila amo ang pagpangawat sang pondo sang gobyerno agud nga magdako pa ang ila manggad.
“Alam na nating kung ano ang gagawin nila, nanakawin nila yung pera ng bayan, para mapayaman sila, para makabili sila ng 40 kotse, [at] magbabayad pa sila ng mga media para interviewhin sila. Alam na natin na nanakawin nila ang pera ng kaban ng bayan,” dugang sini.
Nahibaluan nga sa report sang Philippine Center for Investigative Journalism, dominado gihapon sang political dynasties ang Pilipinas. Pahayag sa report, 80% sang 254 district representatives sa 20th Congress ang halin sa political families.
