Indi kinahanglan nga husgaran ang mga kongresista nga nagpamangkot sang affair ni Ronnie Dayan kay Sen. Leila De Lima sa house probe. Ini ang panindugan ni Capiz 2nd district Representative kag Deputy Speaker Fred Castro sa interview sang Bombo Radyo.
Suno kay Castro, ang mga tawo nga naga husgar ang may panan-awan nga myopic ukon masyado ka lip-ot ang paminsaron kag indi makuha ang strategy sang mga kongresista agud makakuha sang husto nga impormasyon kay Dayan.
Nagkalain-lain man nga pina-agi ang ginhimo sang mga kongresista agud nga mapat-od ang kredibilidad sang mga testimoniya ni Dayan, gane ginhibalo kun ano ka dalom ang relasyon sang duha.
Tungod nga masami nga magka-upod kag naglab-ot pa sa pito ka tuig ang relasyon sang duha, nangin makaduluda suno kay Cong. Castro ang pahayag ni Dayan nga indi sini kilala ang mga high profile inmate sa new bilibid prison kag ang nagakatabo nga illegal drug trade.
Dugang pa sini, kinahanglan nga mahibaluan kung may kamatuoran ang ginpang saysay ni dayan tungod isa ini ka importante nga testigo agud matadlong kag masolusyunan na ang nagaduging nga illegal drug trade sa pungsod.
