Nagpasalamat ang Department of Social Welfare and Development (DSWD) kay Philippine National Police (PNP) Chief Gen. Nicolas Torre III sa donasyon nga naglab-ot sa masobra sa P16 million halin sa event nga “Boxing for a Cause: Laban sa Nasalanta” nga ginpatigayon sa Rizal Memorial Coliseum sa Manila.
Suno kay DSWD Assistant Secretary kag spokesperson nga si Irene Dumlao, ang dako nga kandtidad sang kwarta ang makabulig gid sa mga minilyon ka mga pamilya nga naapektuhan sang habagat kag sang mga bagyo.
Nahibaluan nga ang boxing match nga gin-organisa sang PNP kag gindag-an ni Torre paagi sa default win ang nakasupot sang masobra P300,000 halin sa entrance fees kag dugang nga P16 million halin sa mga donasyon.
Ang kabug-usan nga balor ang paga-turnover sa DSWD subong nga semana.
Samtang, naglab-ot naman sa P293 million ang kabug-usan nga ayuda ang napanghatag sang DSWD sa mga apektado nga indibidwal kag pamilya sang Hulyo, 26, 2025.
