Nagmandu si Education Secretary Sonny Angara nga magtukod sang task force nga amo ang maga-review sang Results-Based Performance Management System (RBPMS) amo man sa workload sang mga manunudlo.
Sa idalom sang DepEd Memorandum Order No. 37, ginsiling sang tiglikom nga dapat usisaon ang implementasyon sang sini nga sistema sa ahensya kag i-review kag i-assess ang mga ulubrahon kag reportorial requirements para malikawan ang overload.
Ini nga review kag assessment suno sa DepEd ang maga-streamline, maga-improve, kag magapa-simple sang mga proseso kag rekisitos sang performance management system kag preparasyon para sa reportorial requirements sang mga manunudlo.
Ang magapungko sa sini nga task force amo ang advisory board kag technical working group.
Ginhatagan man ini sang tatlo ka bulan agud nga mag-pasa sang comprehensive policy recommendation sa Office of the Secretary.
Matandaan nga sang nagligad nga bulan, gin-suspend ni President Marcos ang implementasyon sang RBPMS kag Performance-Based Incentive (PBI) System sa tuyo nga ma-streamline kag magsantuanay ang duha ka nasambit nga Sistema.
Antes sini, ang Teachers’ Dignity Coalition ang una na nag-apelar sa DepEd nga ibasura na ang RBPMS kag magbalik sa mas simple kag mas patas nga performance evaluation system kaangay sa anay Performance Appraisal System for Teachers (PAST).
