Luyag sang aktres nga si Angel Aquino nga may mapasar nga layi sa Pilipinas batok sa mga naga-obra kag nagapalapta sang mga malaswa nga mga post nga gina-gamitan sang artificial intelligence ukon AI.
Gindiskusyunan ini sa hearing sang Senate Committee on Women, Children, Family Relations and Gender Equality nga ginapangunahan ni Senador Risa Hontiveros.
Naangot ini sa isyu sang deepfake porn kun sa diin ginabutang ang nawong sang isa ka tawo sa malain nga video ukon litrato.
Upod sa mga bisita sa hearing ang beterana nga aktre nga nagsiling nga nangin biktima siya sang A.I. porn matapos ginbutang ang iya nawong sa isa ka porn video.
“It was dehumanizing. It was digital assault, one that leaves no bruises on the skin, but strips away one’s dignity in the most obscene manner imaginable,” pahayag ni Angel.
Nagalaum si Angel nga makasunod ang Pilipinas sa paghimo sang layi agud mapunggan ang mga ilegal nga aktibidad gamit ang moderno nga teknolohiya.
Gusto man sini nga pasabton ang mga naga-share kag naga-repost sang malaswa nga mga post nga gin-gamitan sang AI. Dugang sini: “These deepfake photos and videos hurt and violate real people. I urge you all to take action. Punish the perpetrators, those who share and repost, the websites that host it, the platforms that turn a blind eye while it spreads.”
Sa pihak nga bahin, nagalaum naman ang Anti-Cyber Crime Group sang Philippine National Police nga mapa-inan sila sang pondo agud makabakal sang gamit nga makabulig sa ila nga mapangita ang malain nga mga content online kaangay sang deepfake.#
