ILOILO CITY – Kampeon gihapon para sa pamilya Bolando, ang ila himata nga si Angelica Hale, sa Season 12 sang America’s Got Talent.
Ini apisar nga nagtapos lang bilang runner-up ang 10-year old nga Pinay singer.
Sa interview sang Bombo Radyo Iloilo, ginpahayag ni Rugen Bolando Absin, pakaduha ni Eva Bolando-Hale nga iloy ni Angelica, indi mapaathag ang ila kalipay.
Nahandaan na nila ang resulta bangud mismo si Angelica ang nagpabutyag nga iya batunon anuman ang resulta.
Gilayon nagpatigayon sang selebrasyon sa puluy-an sang mga Bolando sa Dipolog City para sa kadalag-an ni Angelica.
Suno kay Absin, may salo-salo ang ila bug-os nga pamilya.
“Unang-una nagpapasalamat po kami sa Panginoon na nabigyan ng chance si Angelica na makapasok sa America’s Got Talent 2017. Sa lahat ng mga taong sumusuporta kay Angelica, thank you, thank you! Masayang-masaya kami. Para sa amin si Angelica ang champion ng Pilipinas, lalong-lalo na dito sa Dipolog City. Thank you Bombo Radyo Iloilo,” suno kay Absin sa interview sang Bombo Radyo Iloilo.
Samtang nagtaas naman ang blood pressure sang lolo ni Angelica nga si Rodrigo Bolando samtang nagahulat sa resulta sang AGT.
Ginpahayag ni Absin nga pagkatapos sang announcement sang winners, gilayon nga nagpalantaw sang blood pressure ang iya amay.
Kagab-i pa sila nagahulat sang resulta sang America’s Got Talent kag nagasamo ang tensyon kag excitement nga nabatyagan ni Mr. Bolando para sa apo sini.
Pero sa karon maayo na ang kahimtangan sini kag nagpakigbahin na sa selebrasyon sang pamilya para sa kadalag-an ni Angelica.
“Excited po talaga kami. Medyo kinakabahan din a saka ready na po kami sa result. Whatever… anong resulta, tanggap talaga namin. Kaya okay lang, okay lang na second lang si Angelica. ‘Yung papa ko Ma’am, nagpa-BP agad eh,” dugang pa ni Absin.