Ginapahayag sang Land Transportation Office Region 6 nga illegal kag ginakabig nga colorum ang operasyon sang mga Angkas Rider sa siyudad sang Iloilo, bangud wala pa sang franchise nga ginahatag sa ila.
Sa interview sang Bombo Radyo kay Jeck Conlu, Assistant Regional Director sang Land Transportation Office Region 6, iya ginpahayag nga bisan sa Manila, ‘pilot testing’ pa lang ang operasyon sang Angkas Rider. Suno sa iya, isa pa ini sa mga isyu nga wala pa naresolba sa Metro Manila, kag subong may yara na sang mga angkas rider sa iban nga lugar lakip na ang Iloilo.
Gindugang pa ni Conlu nga ang pilot testing sang Angkas Rider applicable lang sa Metro Manila, kag ginakinahanglan pa sang layi agud matagaan sang kita sang Land Transportation Franchising and Regulatory Board.
Ginpabutyag niya nga ang ahensya lang nga makahatag sang franchise nga amo ang Land Transportation Franchising and Regulatory Board (LTFRB), gani kun madakpan ang mga rider nga wala sini, ginakabig sila nga colorum.
Nahibaluan nga ang mga Angkas Rider ginakabig nga salakyan sang mga naga-ubra sa dis oras sang kagab-ihon, pakadto sa ulubrahan ukon magpauli sa gab-i, kag sang mga residente nga luyag magsugo ukon magpabakal sang mga kinahanglanon pareho sang pagkaon, bulong, kag mga gamit sa emerhensiya.
Ginapahanumdom sang Land Transportation Office ang publiko nga maghalong sa pagpili sang salakyan, agud malikawan ang risgo sa dalanon.
