Pinasahi ang mangin seremonya sang anibersaryo sang September 11 terror attacks sa New York City subong nga tuig.
Suno kay Bombo International Correspondent Alex Vidal direkta sa New York, sa labing-una nga kahigayunan halin sang 2001, indi na pag-ilakip sa programa ang live reading sang ngalan sang mga biktima sang terroristic attack.
Matandaan nga ang apat ka coordinated suicide attacks sang Setyembre 11, 2001 sa World Trade Centre sa New York ang nagresulta sang kamatayon sang kapin 3,000 ka mga tawo kag masobra 6,000 ang pilason.
Ang duha ka gin-hijack nga eroplano ang nagcrash sa Twin Towers sa World Trade Center sang New York City. Ang ikatatlo nga eroplano ang nagtupa sa Pentagon, headquarters sang Department of Defense malapit sa Washington. Ang ikaapat naman nga eroplano ang nag-crash sa field sa Pennsylvania.
Ini nga hitabo ang ginakabig single deadliest terrorist attack sa maragtas sang Estados Unidos.
Kada tuig matapos ang trahedya, live nga ginabasa sang mga pamilya ang ngalan sang mga napatay.
Apang subong nga 2020, suno kay Vidal, bangud sa mga restrictions bangud sang coronavirus disease 2019 (COVID-19) pandemic, sa baylo nga live ang paglawag sang ngalan sang mga biktima, i-play na lang ang recording sang tingog sang mga pamilya.
May nag-organisa man sang live name-reading sa corner sang Liberty and Church streets kun sa diin ginalauman nga mangin guest si Vice President Mike Pence apang limitado lamang sa 140 ka mga tawo ang makatambong nga dapat lunsay magsunod sa social distancing kag dapat magsuksok sang face mask.
Samtang, nagtweet man ang 9/11 Memorial & Museum bilang pagdumdom sa pagpang-atake sang terrorist group nga al-Qaeda sang 2001: “Nineteen years ago, under clear blue skies, 102 minutes changed our lives forever. On Fri., Sept. 11, we lead the nation and the world in observing the 19th anniversary of the 2001 attacks and ask you to join us in commemorating.” #
(File photos are grabbed from Reuters and AFP)
