Kun katahum ang pagahambalan, sigurado nga malinya ang actress, host, kag fashion icon nga si Anne Curtis mangin sa international personalities kag pamatuod dira ang pag-angkon sini sang iya kaugalingon nga wax figure sa Madame Tussauds Hong Kong.
Ang Madame Tussauds isa ka world famous wax museum nga kilala sa lifelike sculptures sang global stars kag icons.
Ibutang ang figure ni Anne sa Hong Kong Glamour Zone kaupod sa bantog nga Hollywood stars kaangay kanday Nicole Kidman, Brad Pitt, Angelina Jolie, Robert Pattinson, kag Chris Hemsworth.
Sa inisyal nga impormasyon, nasuguran na sang sculptors sa United Kingdom ang pag-obra sa amo nga figure kag ginalantaw nga malunsar ang natapos na nga project sa katapusan sang 2024.
“I cannot believe this is happening. So thrilled to share that I will be joining [Madame Tussauds Hong Kong]. Another dream ANNE-locked!” pagpakigbahin ni Anne sa iya nga Instagram post.
Sini lamang nga 2023 sang nag-selebrar ang nasambit nga 38-anyos nga multi-media star sang iya ika-25 nga tuig sa show business.
Sa guwa naman sang entertainment industry, kilala ang host-actress bilang UNICEF Philippines National Ambassador, kag isa ka proud mom sa ila isa isahanon nga anak ni Erwan Heussaff nga si Dahlia Amelie.
Ang iban pa nga mga Pinoy nga may wax figures sa bantog nga Madame Tussauds museums amo sanday Miss Universe 2015 Pia Wurtzbach kag Manny Pacquiao nga naka-display sa Hong Kong; kag Miss Universe 2018 Catriona Gray nga naka-display sa Singapore.#
