Posible nga magsaka tubtob 1.57 percentage points ang annual headline inflation sang Pilipinas kon maglala ang epekto sang El Niño, suno sa economic experts.
Ang ginalantaw nga ang pagsaka ang bangud sa pagnubo sang ani sang mga mangunguma kag pagdaku sang gasto sa produksyon sang pagkaon.
Suno sa economic experts, ang pinakadaku nga maapektuhan amo ang produksyon sang palay, mais kag iban pa nga pananom, nga mahimo magpamahal sang pagkaon kag iban pa nga mga produkto.
Pahayag pa nga mahimo man nga magnubo ang economic growth sang Pilipinas tubtob sa 0.81 percentage point sa malala nga senaryo subong nga tuig kag 0.61 percentage point naman sa 2027.
Dugang pa, mahimo man nga mabudlayan ang Bangko Sentral ng Pilipinas sa pagkontrol sang pagsaka sang presyo sang mga balaklon, bangud indi bastante ang pagsaka sang interest rate kon ang problema amo ang kakulang sang suplay sang mga produkto.
