ILOILO CITY – Nasolusyunan na sang Iloilo City Government ang problema nga tuga sa pagdinaguso sang mga tawo sa COVID-19 vaccination site sa syudad.
Sa vaccination nga ginapatigayon sa Central Philippine University (CPU), wala ginapahanugutan ang walk-ins, buot silingon, wala ginabaton ang mga residente nga wala naka-pre-register.
Sa interview sang Bombo Radyo kay Mr. Jeck Conlu, COVID-19 spokesperson sang syudad, iya ginpahayag nga istrikto gid nga ginarequire ang ticket kag vaccination card. Kun madula, kinahanglan ini nga ipahibalo sang abanse sa mga personnel nga naga-facilitate sa CPU.
Ginapahanumdom man sa publiko nga magsunod sa schedule.
Subong nga adlaw, Mayo 20, amo ang inoculation sang second dose sang Sinovac vaccine para sa mga nabakunahan sang nagligad nga Abril 20 kag 21.
Sa bwas, Mayo 21, amo ang schedule para sa second dose sang mga nabakunahan sang Sinovac vaccine sang nagligad nga Abril 22 kag 23.
Sa Mayo 24 tubtob 26 amo ang schedule sang first dose sang Astrazeneca vaccine.
Samtang suno naman kay Mayor Jerry Trenas, nagpasugot na ang operators sang Iloilo Convention Center (ICON) nga ipagamit ang area bilang isa pa ka vaccination center.
