Ginahulat pa sang Schools Division of Iloilo ang opisyal nga lista halin sa Department of Education (DepEd) Central Office may kaangtanan sa mga eskwelahan nga makapatuman sang limited face-to-face nga klase.
Apat ka mga eskwelahan sa probinsya sang Iloilo ang nadala sa inisyal nga gin-rekomendar nga madala sa pilot implementation.
Ini amo ang:
- Palanguia National High School sa Pototan, Iloilo
- Granada National High School- Ballesteros Campus sa Carles, Iloilo
- Cabacanan Elementary School sa Alimodian, Iloilo
- Tomas Confesor Memorial Elementary School sa Cabatuan, Iloilo
Sa interview sang Bombo Radyo kay Mr. Leonil Salvilla, information officer sang Schools Division of Iloilo, iya ginpahayag nga nadala man kuntani ang Adgao Tagpu-an Ingay Integrated School sa Tubungan, Iloilo sa ginrekomenda apang wala ini nakatigayon nga makasecure sang clearance halin sa local government unit.
Ang nasambit nga mga eskwelahan ang halin tanan sa localities nga classified bilang low-risk sa COVID-19.
Mas gamay nga numero sang mga estudyante ang makit-an sa classroom kag mas malip-ot ang tyempo nga itinir sang mga ini sa eskwelahan sa tion nga mag-umpisa na ang pilot implementation sang face-to-face classes.
Yari ang lauman nga class size:
Kindergarten: 12 learners
Grades 1 to 3: 16 learners
Senior high school: 20 learners
Yari naman ang maximum contact time ukon kalawigon sang pagtinir sa eskwelahan:
Kindergarten tubtub Grade 3: Tatlo ka oras
Senior high school: Apat ka oras
Blended learning ini gihapon; buot silingon, may tion nga makakadto sa eskwelahan ang mga estudyante apang may yara man gihapon sang i-provide nga self-learning modules.
