Makahulag gid kuntani ang mga electric cooperatives agud nga malikawan nga mapalukdo sa mga konsumidor sang kuryente ang bug-at kag huol nga tuga sang naguba nga high voltage submarine cable sang National Grid Corporation of the Philippines (NGCP).
Kun balik-balikan, sang bulan pa sang Hunyo, nasalapay ang submarine cable sang NGCP matapos naigu sang backhoe samtang nagapatigayon ang Department of Public Works and Highways (DPWH) sang dredging kag re-channeling sa Bio-os River sa Barangay Jagna, Amlan, Negros Oriental.
Bangud sang natabo, nabuhinan ang transmission capacity sang NGCP sa power distribution utilities sa Panay kag Negros Islands kag naapektuhan ang presyo sa merkado.
Sa baylo nga 180 megawatts, 90 megawatts na lang ang transmission capacity nga ginahatag sang NGCP amo nga mga lugar.
Halos tanan nga electric cooperatives ang nagpasaka sang balayran sa kuryente lakip na ang More Electric and Power Corporation (MORE Power) nga amo ang sole power distributor sa syudad sang Iloilo.
Sa interview sang Bombo Radyo kay Atty. Joenar Pueblo, presidente sang Philippine Arbitration Center in the Visayas, iya ginpahayag nga kun may kapaltahan man ukon wala ang NGCP, “indi patas” nga direkta nga ipapas-an sa mga konsumidor ang problema paagi sa pagpasaka sa balayran sa kuryente.
“Indi ni dapat i-burden sa pumuluyo kay te that is part sang business nga ginsudlan mo. It should not be an immediate reaction nga pabayron ninyo ya ang pumuluyo because of that incident. I don’t see that as an immediate justification nga pataason mo ang balayran sa kuryente!”
Suno kay Pueblo, kinahanglan pa gani nga antes makapasaka sa presyo, kinahanglan nga magkuha ang electric cooperative sang permiso halin sa National Electrification Administration (NEA).
Kun ma-aprubahan ang petition sang electric cooperative, ang grupo sang mga konsumidor ang mahimo man nga makadangop sa korte agud nga mapunggan ukon ma-object ang pagtaas sa balayran.
“Ang interes sang electric cooperatives should be to take care of their constituents,” pahayag ni Pueblo. “Ang kooperatiba ni gin-create ini for the benefit sang mga constituents.”
