Ginpatpat sang political analyst ang proseso sang ‘impeachment’ ukon ang pagkakas sa puwesto sang ikaduha nga pinakataas nga opisyal sang pungsod.
Ini ang sa tunga man sang pagpasaka sang ikaduha nga impeachment complaint batok kay Vice President Sara Duterte sa Kamara.
Katuyuan sang nasambit nga reklamo nga mapahalin sa pwesto ang bise presidente.
Sa interview sang Bombo Radyo kay Atty. Nelson Borja, trial lawyer nga naga-specialize sa criminal cases, iya ginpahayag nga mahimo ma-impeach ang isa ka opisyal base sa apat ka rason:
1. Sa tion nga maglapas sa Constitution
2. Treason ukon pag-apin sa kasumpong nga pungsod sa tion sang giyera
3. Graft & corruption
4. Betrayal of public trust
Suno kay Borja, indi makasuhan ang isa ka impeachable official samtang yara sa puwesto bangud sa ginatawag nga ‘immunity’.
Kinahanglan anay ini nga ma-impeach antes mapasakaan sang kaso.
May duha ka proseso ang impeachment.
Una ang impeachment proper nga naga-umpisa sa Kamara sa diin magapungko nga daw kaangay sang piskal ang mga kongresista kag magadesisyon kun sufficient in form and substance ang gin-file nga impeachment complaint.
Kung pareho nga bastante sa form and substance, lantawon nila ang mga ebidensya kung may probable cause.
Kung may yara, ipasaka nila ini sa Senado.
Ang Senado naman ang magaserbe nga hukum kag magadesisyon kung dapat kakason ukon indi ang ang bise presidente.
Sa tion nga ang kaso ang napasaka na sa Senado, ang isa ka impeachable officer kaangay ni Duterte ang ma-impeach.
