ILOILO CITY – Apisar nangin mapait ang iya marriage life, wala ini nangin upang sa isa ka solo parent agud magpadayon sa kabuhi kag hatagan sang mayo nga kabuhi ang iya mga kabataan.
Ini amo si Mrs. Lenore Ravena Enriquez, 56, residente sang Barangay Kasing-Kasing Molo, Iloilo City.
Si Enriquez ang ginkilala bilang 1st runner-up sa Ang Ilongga Awards 2024: Search for the Most Outstanding Female Solo Parent in Iloilo.
Sa interview sang Bombo Radyo kay Enriquez, iya ginpahayag nga sa 26 ka tuig ini nga kasal sa diin ginbugayan sila sang apat ka mga kabataan sa diin tatlo diri ang babaye kag isa ang lalaki.
Suno kay Enriquez, pito na siya ka tuig sa subong nga solo parent matapos nagbulagay sila sang iya bangud man sa pagpanakit sa iya kag sa ila mga kabataan.
Nagtrabaho man ini sa Crisis Intervention Unit bilang Center Supervising House Parent sa City Social Welfare and Development Office (CSWDO).
Sa iya pagtinir sa center, nakapaminsar ini nga padayunon ang iya degree sa Social Work, sa diin balon sini ang iya eksperyensya bilang biktima sang pagpang-abuso sang iya bana.
Sang 2022, nakapasar ini sa Licensure Examination for Social Workers kag nangin Registered Social Worker.
Sa subong, naga-amat-amat na ini move on sa kapait nga naagyan sa kabuhi kag nagpanugyan man ini sa mga kababaihan nga indi magkahadlok nga magpangayo sang bulig sa tion nga mabiktima sang pagpang-abuso kaangay niya.
