Gin-aresto sang National Bureau of Investigation (NBI) ang lima ka mga lalaki kag isa ka babaye nga ginapahayag nga nagtanyag sa isa ka kandidato sa pagka-alkalde sang Iba, Zambales.
Ginaalegar nga ginsiling sang mga suspek nga masarangan nilang nga manipulahon ang resulta sa eleksyon kag padaugon ini kabaylo sang P30 million.
Ang mga naaresto amo sanday Roland Ucab, Teody Abalos, Joseph Ong, Cherrylyn Adriano, Ralp Edward Salas, kag Francis James Mapua.
Ginsaysay ni NBI Director Jaime Santiago nga nagsugod ang kaso gikan sa reklamo sa Commission on Elections (COMELEC) kaangot sa kandidato sa pagka-alkalde sang Iba, Zambales kun sa diin gintanyagan ini sang mga suspek sang “sigurado nga kadalag-an’ kabaylo sang kwarta.
Nagpakilala pa si Abalos nga may direkta ini nga koneksyon sa anay chairman sang COMELEC kag nagsiling pa nga hinablos siya sang isa ka nagakandidato subong sa pagkasenador, apo sang anay COMELEC Chairman Benjamin Abalos.
Samtang, bangud sa pagduda sang nagapadalagan nga mayor sa ila nga mga pahayag, gilayon niya ini nga gin-report sa COMELEC kag nagpasa sang screenshots sang ila nga istorayahanay.
Ginpatigayon ang isa ka entrapment operation nga nagresulta sa pagkadakop sa mga suspek.
Ginpahayag ni NBI Director Santiago nga kasuhan ang anom sang Estafa, Usurpation of Authority kag paglapas sa Automated Election System Law.
