Dakop ang anom ka mga manugpangisda matapos nga iligal nga nagapangisda sa baybayon sang Barangay Punta Buri, Ajuy, Iloilo.
Ang mga arestado amo sanday Joel Betita Chavez, 41-anyos, Elmer Betita Chavez, 43-anyos, Reynaldo Amazan, 49-anyos; Edgie Chavez Francisco, 21-anyos, Ryan Batallones Ascura, 34-anyos, kag Wilfredo Villaruel Chavez, 41-anyos, lunsay residente sang Brgy Nipa, Concepcion, Iloilo.
Sa interview sang Bombo Radyo kay Police Captain Randy Lambungan, hepe sang Ajuy Municipal Police Station, iya ginpahayag nga unauthorize ang mga indibidwal nga magpangisda sa baybayon bangud nga sakop na ini sang banwa sang Ajuy.
Suno kay Lambungan, na-recover sa ila ang pila ka mga pump boat kag mga paraphernalia nga ginagamit sa pagpangisda.
Naglab-ot naman sa 10 kilos ang mga isda nga nakumpiskar sa ila nga nagabalor sang P2,000.
Magapabilin naman sa kustoditya sang Ajuy Bantay Dagat Task Force ang mga kagamitan samtang magapangatubang sang penalidad ang mga nadakpan.
