ILOILO CITY- Arestado ang anom ka mga indibidwal sa ginpatigayon nga drug buybust operation sa Barangay Desamparados, Jaro, Iloilo City.
Ang mga subjects sa operasyon amo sanday alyas Junjun ,34 anyos, kag mag-utod nga sanday alyas Rodel,21 anyos kag alyas Maria, 33 anyos, nga lunsay residente sang amo nga barangay kag ginakabig nga mga High Value Individuals.
Ang iban pa nga nadakpan amo sanday alyas Mak-mak, 41 anyos, residente sang Brgy Desamparados, Jaro, Iloilo City kag isa ka High Value Individual; alyas Carlo, 42 anyos, residente sang Brgy Muelle Loney, Iloilo City Proper; kag alyas Ildrian, 22 anyos, residente sang Brgy. Tuburan Sulbod, Zarraga, Iloilo.
Nakapalagyo naman ang isa ka indibidwal nga si alyas Praning sa operasyon.
Sa interview sang Bombo Radyo kay Police Captain Glen Soliman, head sang Regional Police Drug Enforcement Unit, iya ginpahayag nga halos isa ka bulan man nila nga ginpaidalom sa monitoring ang mga subjects antes natigayon ang operasyon.
Narekober sa mga arestado ang 75 gramos sang suspected shabu nga nagabalor sang P510,000.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang atubangon sang mga arestado.
