Indi magnubo sa anom ka mga indibidwal ang napatay matapos naglaslas ang Bagyong Aghon sa pila mga parte sang Pilipinas.
Suno kay Office of Civil Defense (OCD) spokesperson Edgar Posadas, lakip sa mga napatay ang 14-anyos nga babaye sa Misamis Oriental matapos nga natumbahan sang naluk-ab nga kahoy.
Samtang ang lima naman ang padayon pa nga gina-verify sang ahensya agud nga makumpirma sa diin nagpasalig man ini nga gilayon isapubliko.
Na-record naman sang National Disaster Risk Reduction and Management Council (NDRRMC) ang walo ka mga indibidwal nga napilasan bangud man sa paglaslas sang Bagyong Aghon sa Bicol kag Northern Mindanao.
Suno sa ahensya, kapin 36,143 ka mga indibidwal ang naapektohan sa Cavite, Laguna, Batangas, Rizal kag Quezon ukon CALABARZON lakip na ang Bicol Region.
Nahamtang naman subong sa evacuation centers sang CALABARZON ang 16,426 ka mga residente ukon 4,076 ka mga pamilya, samtang 5,614 naman ka mga indibidwal ang nagpabilin sa ila nga lugar.
Ginpahayag man sang NDRRMC nga may 22 ka mga panimalay ang naguba sa Eastern Visayas bangud man sa nasambit nga bagyo.
Ginpaidalum naman sa state of calamity ang Lucena City sa Quezon bangud sa nangin impact sang Bagyong Aghon, sa diin, ginalauman nga magasunod ang duha ka mga distrito sa pagdeklara sang state of calamity.
Bangud man sa Aghon, naglab-ot sa 11 ka domestic kag 1 ka international flights ang nakansela.
Naapektohan naman ang kapin 60 ka pantalan, sa diin 47 diri ang nagpanumbalik na sang operasyon, apang may total nga 449 ka mga pasahero, 25 ka rolling cargoes, anom ka vessels, kag lima ka mga motorbancas ang na-stranded sa CALABARZON, Bicol, and Central Visayas.
